10/10/2024
Жұбанов университетінде физика бойынша Республикалық студенттік пәндік олимпиада басталды
Бүгін Жұбанов университетінде «Физика мұғалімдерін даярлау» білім беру бағдарламасы бойынша оқитын студенттер арасында XVI Республикалық пәндік олимпиада ашылуы өтті.
Олимпиада ашылуында университет басшылығы еліміздің әр өңірінен келген білімді жастарға сәттілік тіледі.
Академиялық мәселелер жөніндегі проректор Людмила Мясникова бұл іс-шара жоғары оқу орындары арасындағы өзара тәжірибе алмасу екенін атап өтті.
«Материалдардың радиациялық физикасы» ғылыми-зерттеу орталығының жетекшісі, физика-математика ғылымдарының докторы, профессор Куанышбек Шункеев олимпиаданың университет базасында өткізілуі кездейсоқ еместігін айтты.
«Бұл университеттің өзіндік дәстүрі бар. Кезең-кезеңімен біздің оқу орны физика пәні бойынша бірнеше рет бірінші орынды иеленіп келеді. Бұл біздің университетімізде мықты математиктер базасы тереңнен қалыптасқанын көрсетеді»,- деді профессор.
Айта кетейік, өткен жылы академик Е.А.Бөкетов атындағы Қарағанды университетінде өткен Республикалық студенттік пәндік олимпиадада «Физика мұғалімдерін даярлау» білім беру бағдарламасы бойынша Жұбанов университетінің командасы бірінші орын иеленген болатын.
Аталған олимпиада екі күнге созылады. Білім додасында бақ сынауға еліміздің 16 жоғары оқу орнынан командалар келді.