21/10/2024
Zhubanov university білім алушысы Сoursera платформасында көрсеткен үздік нәтижесі үшін марапатталды
ҚР Ғылым және жоғары білім беру министрлігінің Жоғары және жоғары оқу орнынан кейінгі білім комитеті және BMG UpSkill компаниясы бірлесе отырып, «Coursera» платформасында білім алушылардың үлгерімін талдау қорытындысы бойынша жазғы маусымда жоғары нәтиже көрсеткен 15 білім алушыны «ConnectEd 2024: Innovate.Educate.Elevate» конференциясында марапаттады.
Марапатталушылар қатарында Жұбанов университетінің «Есептеу техникасы және бағдарламалық қамтамасыз ету» білім бағдарламасының 2 курс магистранты Маралбек Саматов бар.
Айта кетейік, Маралбек Саматов техникалық қамтамасыз ету негіздері, Python көмегімен деректерді шығару, өңдеу және визуализациялау, жасанды интеллект (AI), нейрондық желілер және терең оқыту, киберқауіптер және шабуыл векторлары және тағы да басқа барлығы 12 курсты жоғары деңгейде сәтті аяқтап, сертификат иеленді.
«Coursera платформасы менің ғылыми зерттеу саламдағы мықты мамандармен және кәсіби сарапшылармен пайдалы байланыс орнатуға мүмкіндік берді. Курстарда алған білімім негізгі тақырыптар туралы түсінігімді тереңдетуге, сонымен қатар магистрлік диссертацияма қатысты мәселелерді терең зерттеуге үлкен септігін тигізді. Оқытудың форматы өте тиімді. Маңызды дағдыларды меңгеруде әлемдік деңгейдегі озық білім беру платформасын тегін пайдалану – бұл біздерге берілген үлкен мүмкіндік», - дейді ол.