29/10/2024
Жұбанов университетінде Республикалық пәндік олимпиада өтті
Бүгін Жұбанов университетінде «Арнайы педагогика» білім бағдарламасы бойынша XVI Республикалық пәндік олимпиада өтті.
Пән олимпиадасының ашылу салтанатына университет басшылығы қатысып, командаларға сәттілік тіледі. Ғылым және инновациялар жөніндегі проректор Рахым Бекназаров бұл олимпиада тек білім жарысы ғана емес, студенттерге ғылыми байланыс жасау және тәжірибе алмасу алаңына айналатынына сенім білдірді.
Айта кетейік, өткен оқу жылы Жұбанов университетінің «Арнайы педагогика» білім бағдарламасының студенттері Манаш Қозыбаев атындағы Солтүстік Қазақстан университетінде өткен Республикалық пәндік олимпиадада жүлделі 1 орын иеленген болатын. Осыған орай дәстүрлі білім сайысының ережесіне сәйкес кезекті олимпиада Жұбанов университеті базасында ұйымдастырылып отыр.
Білім додасында еліміздегі жоғары оқу орындары, атап айтсақ, Абай атындағы ұлттық педагогикалық университеті, Қазақ Ұлттық Қыздар педагогикалық университеті, Е.Бөкетов атындағы Қарағанды университеті, Өзбекәлі Жәнібеков атындағы Оңтүстік Қазақстан педагогикалық университеті, М.Х.Дулати атындағы Тараз университеті, Әлкей Марғұлан атындағы Павлодар педагогикалық университеті, Ш.Есенов атындағы Каспий технологиялар және инжиниринг университеті, Х.Досмұхамедов атындағы Атырау университеті және Жұбанов университетінен 9 команда қатысып, өзара бақ сынады.
Сайыс екі кезеңнен тұрды. Жоба дайындау және тестілеу.
Олимпиада аясында еліміздің жоғары оқу орындарынан келген студенттер университеттің Мұхтар Арын атындағы бас оқу ғимараты және Хериот-Уотт кампусымен танысып, оқу орнының мұражайын аралап көрді.