20/11/2024
Сoursera платформасында үздік нәтиже көрсеткен білім алушылар марапатталды
Жұбанов университетінде 2024 жылдың жазғы маусымында Coursera платформасында бірнеше курсты сәтті аяқтаған 20-ға жуық білім алушы университет ректорының алғыс хатымен марапатталды.
Айта кетейік, 2023 жылдың қаңтарынан бастап Қазақстанның жоғары оқу орындарының студенттері үшін Coursera әлемдік онлайн-білім беру платформасын пайдалану мүмкіндігі ашылды. Жұбанов университеті бұл жобаға қатысқан алғашқы жоғары оқу орындарының бірі. Университеттің 4500-ден астам студенті 1500-ге жуық курсты қазақ, орыс және ағылшын тілдерінде сәтті аяқтап, жалпы 5100 сертификатқа қол жеткізді.
2024 жылы жазғы маусымда Coursera платформасындағы IV лек аясында университеттің 900 білім алушысы әртүрлі курстарды аяқтап, заманауи білім мен жаңа трендтерді меңгерді.
Марапаттау рәсімі барысында студенттер Coursera платформасының әлемдік деңгейдегі үздік курстарға қол жеткізуге мүмкіндік бергенін және заманауи білім алуда үлкен рөл атқарғанын атап өтті. Олар сондай-ақ университет басшылығына осындай мүмкіндікті ұйымдастырғаны үшін алғыстарын білдірді.
Қазіргі уақытта Жұбанов университетінде Coursera платформасының V легіне белсенді тіркеу жүргізілуде. Студенттер өздерінің кәсіби дағдыларын дамыту мен жаһандық білім алуға деген қызығушылығын жалғастыруда.