26/12/2024
Жұбанов университетінде 3D моделдеу шеберханасы ашылды
Бүгін Жұбанов университетінде Еуразиялық дизайнерлер одағының мүшесі, педагогика ғылымдарының кандидаты, доцент Мұса Шаштығарин атындағы 3D моделдеу шеберханасының ашылу рәсімі өтті. Бұл маңызды оқиғаға университет басшылығы, профессор-оқытушылар құрамы, сондай-ақ Мұса Шаштығариннің туыстары мен достары қатысты.
Университет ректоры Лаура Қарабасова оқу орнында ұзақ жылдар бойы қызмет еткен Мұса Шаштығариннің университеттің мәдени өмірінің дамуына қосқан өлшеусіз еңбегін атап өтті. Сонымен қатар, ол өнер мен ғылымды ұштастырған ғалымның мұрасына арналған 3D моделдеу шеберханасының ашылуы университеттің профессорлық-оқытушылар құрамына және студенттерге үлкен маңызы бар екенін жеткізді.
Мұса Шаштығарин атындағы 3D моделдеу шеберханасы заманауи және жоғары технологиялық құралдармен жабдықталған. Шеберхана студенттерге ғылыми зерттеулер мен шығармашылық жобаларын жүзеге асыру үшін барлық қажетті мүмкіндіктерді ұсынады. Бұл орын болашақ мамандардың кәсіби дағдыларын шыңдауға, сондай-ақ олардың шығармашылық әлеуетін толық ашуға көмектесетін маңызды алаң болып табылады.