27/12/2024
Жұбанов университетінің 5 ғалымы «Жоғары оқу орнының үздік оқытушысы» атағын иеленді
«2024 жылғы Жоғары оқу орнының үздік оқытушысы» байқауының жеңімпаздары белгілі болды. Бұл байқауда еліміздің 38 жоғары оқу орнының 150 оқытушысы жеңімпаз атанды.
Жеңімпаздар қатарында Жұбанов университетінің оқытушылары техникалық ғылымдар кандидаты, қауымдастырылған профессор, «Металлургия және тау-кен ісі» кафедрасының доценті Өтеген Сариев, PhD, «Металлургия және тау-кен ісі» кафедрасының доценті Даурен Есенгалиев, PhD, қауымдастырылған профессор «Металлургия және тау-кен ісі» кафедрасының доценті Ербол Шабанов, тарих және дінтану кафедрасының меңгерушісі, тарих ғылымдарының докторы, профессор Гүлбану Избасарова және Dr. Rer. Nat, Heriot-Watt жоба жетекшісі Бекдаулет Шүкірғалиев бар.
Жеңімпаздардың әрқайсысы 2000 АЕК көлемінде сыйақы алатын болады, бұл шамамен 7 млн теңгені құрайды. Ақшалай ынталандырудан бөлек «2024 жылғы Жоғары оқу орнының үздік оқытушысы» конкурсының жеңімпаздары төсбелгіге ие болады.
Конкурс жыл сайын оқытушылардың кәсіби деңгейін арттыру, олардың ғылыми және педагогикалық қызметін ынталандыру мақсатында өткізіледі. Биылғы байқауда үміткерлердің электронды оқу ресурстарын жасау, ғылыми мақалалары мен өнертабысқа патенттерінің болуы, оқу сапасы, сондай-ақ білім беру деңгейлерінде (бакалавриат, магистратура, докторантура) жеткен жетістіктері бағаланды.
Айта кетейік, конкурс ҚР Ғылым және жоғары білім министрлігінің ақпараттық жүйесінің базасында өтті, оның көмегімен қатысушылар барлық кезеңдердің ашықтығын бақылай алды. Комиссия құрамына ҮЕҰ, ЖОО қауымдастықтарының өкілдері және білім беру саласындағы сарапшылар енгізілді.
Жұбанов университетінің ұстаздарын «Жоғары оқу орнының үздік оқытушысы» атағымен құттықтаймыз!