25/11/2024
Қ.Жұбановтың 125 жылдығына орай Республикалық пікірсайыс турнирі өтті
23-24 қараша күндері Жұбанов университетінде Қ. Жұбановтың 125 жылдығына арналған республикалық пікірсайыс турнирі өтті. «Қ. Жұбанов – ғылым көгінің жарық жұлдызы» тақырыбымен ұйымдастырылған бұл іс-шара Құдайберген Жұбановтың ғылыми мұрасын насихаттау және жастардың ғылыми-танымдық қызығушылығын арттыру, сондай-ақ пікірсайыс мәдениетін дамыту мақсатын көздеді.
Турнирге еліміздің Алматы, Шымкент, Астана, Орал, Ақтау, Атырау сынды қалаларынан 36-дан астам фракция қатысты. Қатысушылар Жұбановтың еңбектерін насихаттау, университетті дамыту, жасанды интеллекттің рөлі, қаржылық сауаттылық және Қазақстанның даму болашағы секілді маңызды тақырыптарды талқылады.
Бұл турнир тек пікірталас алаңы ғана емес, сонымен қатар Құдайберген Жұбановтың еңбектерін жаңа қырынан тануға мүмкіндік беріп, жастар арасында оның ғылыми мұрасын дәріптеуге бағытталған маңызды мәдени-ағартушылық шара болды.
Жүлделі бірінші орынды «Тэо ойында» (Нархоз университеті), екінші орынды «Ағалы–қарындас» (Сәкен Сейфуллин атындағы Қазақ агротехникалық зерттеу университеті және Есенов атындағы Каспий мемлекеттік технологиялар және инжиниринг университеті), ал үшінші орынды «Ниетіңе қарай» (Қ.И. Сәтбаев атындағы Қазақ ұлттық техникалық зерттеу университеті және Нархоз университеті) командалары иеленіп, арнайы дипломдармен және ақшалай сыйлықтармен марапатталды.