03/12/2024
Ұлттық рух - ұлы құндылық
Бүгін Жұбанов университетінде «Ұлттық рух тұғыры» тақырыбында ғылыми-тәжірибелік конференция өтті. Бұл шара «Сыбаға» ұлттық дәстүрлер фестивалі аясында ұйымдастырылып, қазақ халқының тарихи және мәдени мұрасын дәріптеу, ұлттық рухты нығайту мәселелерін талқылауға арналды. Конференцияға белгілі ғалымдар, қоғам қайраткерлері, тарихшылар және зиялы қауым өкілдері қатысып, ұлттық құндылықтарды зерттеу мен насихаттаудың маңыздылығын сөз етті.
Университет ректоры Лаура Қарабасова ғылыми қауымдастық ретінде университеттің ұлттық рухты зерттеу мен насихаттаудағы рөліне тоқталып, Жұбанов университетінің ғалымдарының бұл бағыттағы үлесі
ерекше екенін атап өтті.
Жиында Ақтөбе облысы әкімінің орынбасары Жолдас Батырхан құттықтау сөз сөйледі. Ол фестивальдің алғашқы шарасы Жұбанов университетінен бастау алып отырғанын жеткізіп, ұрпаққа рухани тәрбие беру және қоғамдағы бірлік пен ынтымақтастықты нығайту бағытындағы маңызды шараның бір апта көлемінде жалғасатынын айтты.
Ғылыми жиында қазақ мәдениетінің тарихи кеңістігіндегі ұлттық сана, қазақ халқының бірлік философиясы, батырлар жырының ұрпақ санасына әсері, қазақ халқының ұлттық коды, ұлттық бейнелер мен жастардың мәдениеттегі рөлі туралы терең баяндамалар жасалды. Ғалымдар қазақ ұлтының болашағын ғылыми тұрғыдан зерделеп, ұлттық рухты нығайту жөнінде бірқатар ұсыныстарын ортаға салды.
Айта кетейік, «Сыбаға» ұлттық дәстүрлер фестивалі 2-6 желтоқсан аралығында өтеді. Фестивальдің әр күнінде ұлттық рухани құндылықтарды дәріптеуге бағытталған арнайы іс-шаралар жоспарланған.