03/12/2024
Zhubanov university-де Open day өтті
Бүгін Жұбанов университетінде мектеп оқушыларына арналған ашық есік күні өтті. Бұл шараға қала мен аудан мектептерінен мыңға жуық жоғары сынып оқушылары қатысты.
Академиялық мәселелер жөніндегі проректор Людмила Мясникова бұл шараның жаңа оқу жылындағы алғашқы ашық есік күні екенін және алдағы уақытта мұндай шаралардың жалғасатынын айтты. Оның айтуынша, бұл күн оқушылардың университет туралы толық мәлімет алуына мүмкіндік беру үшін диалог форматында өткізілген. Шара барысында қабылдау комиссиясының мамандары оқушылардың барлық сұрақтарына жауап беріп, қажетті ақпаратпен қамтамасыз етті.
Ашық есік күні оқушыларға жоғары білім алу жолындағы маңызды қадамдарды түсінуге көмектесті. Оқушыларға университетке түсу шарттары, ұсынылатын мамандықтар, бейіндік пәндер, академиялық ұтқырлық бағдарламасы және шетелдік дипломды елден шықпай алу мүмкіндіктері туралы толық ақпарат берілді. Сонымен қатар, университеттің Хериот-Уотт британдық кампусы мен басқа да артықшылықтары таныстырылды.Мектеп оқушыларына кампустарды аралау мүмкіндігі де берілді.
125 high school мектебінің оқушысы Дания Есентаева шараның өте пайдалы болғанын айтты: - Мұндай іс-шаралар үлкен таңдау алдында тұрған оқушылар үшін маңызды. Кейде мамандық таңдауда қателесу қорқынышы болады. Бүгін мен Жұбанов университеті туралы және болашақ мамандығым туралы көптеген құнды ақпарат алдым. Ұйымдастырушыларға алғысым шексіз, – деп бөлісті ол.