06/01/2025
Мәжіліс депутаттары Жұбанов университетінің профессор-оқытушыларымен кездесті
Бүгін Жұбанов университетіне Қазақстан Республикасы Парламенті Мәжілісінің депутаттары Жұлдыз Сүлейменова мен Қазыбек Әлішев келіп, университеттің профессор-оқытушылар құрамымен маңызды кездесу өткізді.
Кездесу барысында отбасылық құндылық, жастарды еңбекке баулу және білім беру саласындағы тәрбие мәселелері кеңінен талқыланды.
Жұлдыз Сүлейменова өз сөзінде интеллектуалдық құндылықтардың маңыздылығын атап өтіп, адамның өміріндегі табыс әлеуметтік жағдайға емес, ең алдымен білім мен еңбекке деген ұмтылысқа байланысты екенін айтты. Сонымен қатар, табысқа жету жолында табандылық, еңбекқорлық, кітап оқу, жаңашылдық пен уақытты тиімді пайдалану секілді факторлардың мәні зор екеніне тоқталды.
«Әлемдік стандарттар бойынша ең басты құндылық — интеллектуалды құндылықтар. Уақытты тиімді пайдалану қажет. Егер жаңа өмір бастау қаласаңыз, қазір жаңа кітаптар оқып, жаңаша ізденістерге барыңыз. Өткен уақытты қайтару мүмкін емес, бірақ алдыңызда жаңа жетістіктер мен мүмкіндіктер бар», — деп атап өтті депутат.
Кездесу соңында университеттің профессор-оқытушылары депутаттарға өз ұсыныстарын білдіріп, сұрақтар қойып, пікір алмасу үшін кең мүмкіндік алды.