13/01/2025
Heriot-Watt университеті Ақтөбе кампусының студенттері Малайзия және Эдинбург кампустарына оқуға жіберілді
ҚР Президентінің тапсырмасымен Қ.Жұбанов атындағы Ақтөбе өңірлік университеті базасында ашылған Heriot-Watt университетінің Ақтөбе кампусының студенттерінің алғашқы легі Малайзия және Эдинбург кампустарына оқуға жіберілді.
Heriot-Watt университетінің Ақтөбе кампусының 2 курсында оқитын 16 студент GoGlobal академиялық ұтқырлық бағдарламасы аясында білімін жетілдіру үшін британдық жетекші университеттің басқа кампустарына аттанды.
«Студенттердің ағылшын тіліндегі деңгейі мен академиялық көрсеткіштері (GPA) аса мән берілген басты критерийлердің бірі болды. Басқа кампустарға жіберілгенімен, студенттеріміздің оқуы грант негізінде әрі қарай жалғасатынын атап өткім келеді», - дейді Heriot-Watt университетінің Ақтөбе кампусының жоба жетекшісі Ақкенже Трушева.
Студенттер шетелдік кампустарда бір семестр бойы білім алады, бұл уақыт ішінде олар тек академиялық білімдерін жетілдіріп қана қоймай, халықаралық тәжірибе жинақтайды, түрлі мәдениеттермен танысады және әртүрлі елдерден келген студенттермен бірлесе жұмыс істеуді үйренеді. Сонымен қатар, студенттер халықаралық ортаға терең ену арқылы жаһандық процестерді жақсырақ түсінуге мүмкіндік алып, өздерінің кәсіби дағдыларын дамытуда маңызды қадам жасайды.
Дильшод Рахманкулов Малайзия кампусына келгендегі алғашқы әсерлерімен бөлісті: «Бұл мен үшін тек білімімді жетілдіріп қана қоймай, жаңа мәдениетпен танысу, қызықты адамдармен кездесу және көкжиегімді кеңейтуге берілген үлкен мүмкіндік. Ақтөбе кампусынан келген менен бөлек тағы 10 студент жатақханаға орналастық, бізге кампус бойынша экскурсия жүргізілді. Ал 13 қаңтарда оқуымыз басталады», - дейді Дильшод.