17/01/2025
Профессор-оқытушылар мен қызметкерлер арасында өткен спартакиада мәресіне жетті
Бүгін университетте профессор-оқытушылар мен қызметкерлер арасында өткізілген дәстүрлі спартакиаданың жабылу салтанаты өтті. Биылғы спартакиада 8 спорт түрі бойынша ұйымдастырылды: ату жарысы, шахмат, тоғызқұмалақ, дартс, үстел теннисі, стритбол, шағын футбол, сондай-ақ қыздар мен ерлер арасында волейбол.
Әлеуметтік және тәрбие жұмысы жөніндегі проректор Еркін Тастанқұлов спартакиаданың басты мақсаты бұқаралық спортты насихаттау ғана емес, сондай-ақ ұжым арасындағы ынтымақтастық пен бірлікті нығайту екенін атап өтті.
Жарыста факультеттер мен әкімшіліктен барлығы 230-ға жуық қатысушы командалық есепте өзара сынға түсті. Қорытынды бойынша, командалық есепте бірінші орынды кәсіби-шығармашылық факультеті командасы жеңіп алды. Екінші орынды жаратылыстану факультеті, ал үшінші орынды техникалық факультеті командасы иеленді. Жеңімпаздар ақшалай сыйлықтармен және дипломдармен марапатталды.