17/01/2025
«Қ.Жұбанов атындағы Ақтөбе өңірлік университеті» КеАҚ базасында орналасқан Хериот-Уотт университетінің Ақтөбе кампусының білім беру бағдарламалары тиісті кәсіби оқу орындары немесе ғылыми қауымдастықтар тарапынан аккредиттелген, оның ішінде Инженерлік-технологиялық институт (Institution of Engineering and Technology), Механикалық инженерлер институты (the Institution of Mechanical Engineers), Химиялық инженерлер институты (the Institution of Chemical Engineers), Физика институты (the Institute of Physics) және Корольдік химиялық қоғам (the Royal Society of Chemistry) бар.
Компьютерлік инженерия саласындағы дәреже BCS (The British Computer Society), Ақпараттық технологиялар институты (the Chartered Institute for IT) тарапынан аккредиттелген.
Электроэнергетика саласындағы дәреже Инженерия және технологиялар институты (the Institution of Engineering and Technology) тарапынан аккредиттелген.
Мұнай инженериясы және энергоменеджмент саласындағы дәрежесі Энергетикалық институт (Energy Institute) және Материалдар, пайдалы қазбалар және тау-кен ісі институты (Institute of Materials, Minerals & Mining) тарапынан аккредиттелген.
Аталған техникалық мамандықтарды жоғары оқу орны басшылығының толық бақылауымен халықаралық команда және Қ.Жұбанов атындағы Ақтөбе өңірлік университетінің профессор-оқытушылар құрамы оқытады. Бұл мамандықтар Дубай мен Малайзия кампустарында да оқытылады, бұл елдер дәстүрлі және консервативті құндылықтарға ие.
2023 жылы Республикалық комиссияның шешімі бойынша 300 талапкер осы кампуста білім алу үшін білім грантын жеңіп алды, олардың 35%-ы ауылдық жерлерден шыққан жастар; 41,7%-ы әлеуметтік осал топтардан шыққан, олар үшін мемлекеттік қолдау ерекше маңызға ие; 14%-ы көпбалалы отбасылардан шыққан студенттер. Осылайша, кампустың ашылуы өңір үшін әлеуметтік миссия да атқарады.
Қазіргі уақытта студенттер мен ата-аналары оқытудың жоғары деңгейі мен сапасын атап өтіп, осы кампуста білім алу оларға болашақта үлкен мүмкіндіктерге жол ашатынына сенімді.
