23/10/2025
Құқықтық мәдениет – қоғамның тұрақтылық негізі
Қоғамның өркениетті дамуы ең алдымен азаматтардың құқықтық сауаттылығы мен заңға деген құрметінен басталады. Сол себепті білім беру ұйымдары мен құқық қорғау құрылымдарының серіктестігі – құқықтық мәдениетті қалыптастырудың тиімді тетігі болып отыр.
Осы бағытта Қ. Жұбанов атындағы Ақтөбе өңірлік университеті мен Ақтөбе облысының Құқықтық статистика және арнайы есепке алу жөніндегі департаменті өзара ынтымақтастық туралы меморандумға қол қойды.
Бұл құжат студент жастар арасында құқықтық сауаттылықты арттырумен қатар, заң саласында білім алып жатқан болашақ мамандардың кәсіби даярлығын күшейтуді көздейді. Яғни, университет қабырғасында алынған теориялық білім енді нақты статистикалық деректермен және тәжірибелік жағдайлармен ұштасатын болады.
Меморандум аясында бірлескен ғылыми-зерттеу жобалары, тәжірибеден өту мүмкіндіктері мен профилактикалық іс-шаралар жүзеге асырылады. Мұндай әріптестік – студенттерге тек құқық саласын меңгеруге емес, қоғамдағы әділдік пен жауапкершілік құндылықтарын бойына сіңіруге жол ашады.