Халықаралық ынтымақтастық департаменті Қ.Жұбанов атындағы Ақтөбе өңірлік университетінің құрылымдық бөлімшесі болып табылады. Департаменттің негізгі мақсаты – университет қызметін интернационалдандыру, халықаралық серіктестікті дамыту, сондай-ақ университеттің әлемдік білім беру кеңістігіндегі орнын нығайту және жаһандық білім мен ғылым қауымдастығына интеграциялау.
Бүгінгі таңда университет 22 елдің (АҚШ, Еуропа, Азия және ТМД мемлекеттері) 74 шетелдік жоғары оқу орны және білім беру ұйымымен ынтымақтастық орнатқан. ARU әлемдік жетекші ЖОО-лармен, оның ішінде жаһандық рейтингтерде (TOP 500) орын алған 7 университетпен, Erasmus+ бағдарламасы бойынша 6 және академиялық ұтқырлық шеңберінде 30 шетелдік ЖОО-мен әріптестік қарым-қатынаста.
Халықаралық әріптестік келісімдер аясында университетте қос дипломды білім беру бағдарламаларын іске асыру, бірлескен ғылыми-зерттеу жобаларын жүргізу, ғылыми-практикалық семинарлар мен конференциялар ұйымдастыру, профессорлық-оқытушылар құрамы мен студенттер алмасуын қамтамасыз ету, сондай-ақ сыртқы академиялық ұтқырлықты дамыту бағыттары қарастырылған. Осы бастамалар нәтижесінде университеттің студенттері мен оқытушылары Түркия, Польша, Қытай, Болгария, Латвия, Литва, Украина, Ресей, АҚШ және өзге де елдердегі серіктес жоғары оқу орындарында білім алу және тәжірибе жинақтау мүмкіндігіне ие болды.
Университеттің жаһандық білім беру кеңістігіндегі позициясын нығайту мақсатында ARU бірнеше жыл бойы QSSUR әлемдік рейтингке шығу бойынша жүйелі жұмыс жүргізіп келеді. Осы бағыттағы табысты жұмыстың нәтижесінде университет 2022 жылы QS University Rankings: EECA тізімінде 351-орынға, ал 2024 жылы QS University Rankings: Asia рейтингінде 601-орынға ие болды.
ARU Қазақстандағы шет мемлекеттердің дипломатиялық өкілдіктерімен (АҚШ, Қытай, Польша, Түркия, Италия, Оңтүстік Корея, Әзірбайжан және Өзбекстан елшіліктері) және Қазақстан Республикасының Түркия мен Польшадағы елшіліктерімен тығыз ынтымақтастықта жұмыс істейді.
Халықаралық ынтымақтастықтың ашық саясатын ұстана отырып, университет Болон үдерісі мен Magna Charta Universitatum-ның толыққанды мүшесі болып табылады. Сонымен қатар, ARU Шанхай университеттерінің ынтымақтастық ұйымы (ШЫҰ), Еуразиялық университеттер қауымдастығы (EURAS), Азия университеттері қауымдастығы, Кавказ университеттері қауымдастығы (KUNIB), сондай-ақ Беларусь Республикасы мен Қазақстан Республикасының ғылыми-білім беру консорциумының мүшесі болып табылады.
Университеттің стратегиялық серіктестерімен ынтымақтастығының негізгі бағыттары – академиялық ұтқырлықты дамыту, қос дипломдық білім беру бағдарламаларын іске асыру және шетелдік ғалымдарды тарту болып табылады. Қос дипломды білім беру Польша, Қытай және Беларусь университеттерімен бірлесе жүзеге асырылып келеді. Атап айтқанда, «Дене шынықтыру және спорт» мамандығы бойынша 6 студент Польша Республикасының Быдгощ қаласындағы Экономика университетінің еуропалық үлгідегі дипломына ие болса, «Прокурорлық және жедел-іздестіру қызметі» мамандығы бойынша 1 магистрант Янка Купала атындағы Гродно мемлекеттік университетінің дипломын иеленді.
ARU-ды интернационалдандыру бағытындағы негізгі басымдықтардың бірі – дәрістер, практикалық және шеберлік сабақтары, ғылыми-әдістемелік семинарлар мен дөңгелек үстелдер өткізуге шетелдік ғалымдарды тарту бағдарламасы болып табылады. Бүгінгі таңда университетке АҚШ, Канада, Франция, Германия, Литва, Болгария, Польша, Эстония, Оңтүстік Корея, Қытай, Түркия, Ресей, Беларусь және басқа да 15 елдің жетекші жоғары оқу орындарынан шетелдік профессорлар шақыртылуда.
Университет жанында бірқатар тіл орталықтары мен зертханалар белсенді жұмыс атқаруда. Атап айтқанда, Конфуций институты, корей тілі орталығы, поляк тілі мен мәдениеті орталығы, қазіргі түркі тілдерін зерттеу зертханасы, сондай-ақ Конфуций институтының HSK халықаралық қытай тілі тестілеу орталығы қызмет етеді.
ARU шетелдік халықаралық орталықтармен, ұйымдармен және қорлармен тығыз байланыс орнатқан. Олардың қатарында: Қытай тілінің халықаралық білім беру қоры (ҚХР), «SES» неміс аға сарапшылық қызметі (Германия), «TİKA» Түрік ынтымақтастық және үйлестіру агенттігі (Түркия), «ISSA» халықаралық студенттер қауымдастығы (Түркия), «EURIE» Еуразиялық жоғары білім саммиті, «UniCen» американдық кеңесі (АҚШ), Британдық кеңес (Ұлыбритания), Еуропалық комиссияның Брюссельдегі өкілдігі (Бельгия), «IFEAC» Францияның Орталық Азияны зерттеу институты, «Еуропалық білім беру форумы» (Болгария), «Қазіргі білім беру және зерттеу институты» (Бельгия), «Қазақстандағы Ұлттық академиялық алмасу орталығы» (Польша), сондай-ақ «Болашақ» халықаралық бағдарламалар орталығы (Қазақстан) бар.