ТҰРАҚТЫ ДАМУ МАҚСАТТАРЫНА БІЗДІҢ ҮЛЕСІМІЗ
ТДМ 1: КЕДЕЙЛІКТІ ЖОЮ
Кедейлікті барлық нысандарында, барлық жерде жою.
Университет әлеуметтік осал топтардан шыққан студенттерге атаулы қолдау көрсетіп, жатақханаға және білім алу мүмкіндіктеріне басым қолжетімділікті қамтамасыз етеді. Бұл шаралар жоғары білім алуға кедергілерді азайтуға көмектесіп, Тұрақты даму мақсаты №1 – кедейлікті жоюды іске асыруға ықпал етеді.
Соңғы жылдары әлеуметтік қолдау алатын студенттер саны тұрақты түрде артып келеді.
2024 жылы университет шет қалмай, мұқтаж жандарға тұрақты түрде жан-жақты көмек көрсетті. Жұбанов университетінің шамамен 50 студенті Ақтөбе облысының Жастар саясаты басқармасымен бірлесіп, «Біз біргеміз» акциясы аясында су тасқынына қарсы іс-шараларға белсенді қатысты.
Еріктілер Ілек өзеніндегі су деңгейінің көтерілуіне байланысты Кирпичный ауылы бағыты бойынша қорғаныс дамбасын салу жұмыстарына жұмылдырылды. 2024 жылғы 31 наурызда су тасқынына қарсы іс-шаралар барысында Жұбанов университетінің қызметкерлері Төтенше жағдайлар департаментінің құтқарушыларына арналған азық-түлік жиынтықтарын дайындап, сондай-ақ 11-шағын ауданда жұмыс істеген коммуналдық қызметкерлерге ыстық палау таратты.
2024 жылғы 27 наурыздан бастап Жұбанов университетінің шамамен 500 еріктісі төтенше жағдайдың алдын алу шараларына қатысып, құм тасу, дамбалар мен қорғаныс құрылыстарын салу, сондай-ақ эвакуациялық жұмыстарға жұмылдырылды. Гуманитарлық орталықтар да бірінші кезектегі қажетті заттарды тасымалдау мен жеткізуге, сондай-ақ басқа өңірлерден келіп түскен гуманитарлық көмекті қабылдау және үйлестіруге қолдау көрсетті.
Университет қызметкерлері, студенттері және «Тағам өнімдерінің технологиясы» білім беру бағдарламасының оқытушылары эвакуация аймақтарында жұмыс істеген 250-ден астам маманды ыстық тамақпен қамтамасыз етті. Эвакуациялық пункттердегі отбасыларға психологиялық қолдау көрсету мақсатында Педагогика және менеджмент факультетінің студенттері мен оқытушылары психологиялық тренингтер өткізді. Сонымен қатар, 50-ден астам суретші мен кәсіби-шығармашылық факультеттің 12 оқытушысы балаларға арналған арт-терапия және сурет салу сабақтарын ұйымдастырды.
ЖАС ҒАЛЫМДАРДЫ ЖЕҢІЛДЕТІЛГЕН ТҰРҒЫН ҮЙ БАҒДАРЛАМАЛАРЫ АРҚЫЛЫ ҚОЛДАУ
Жас зерттеушілерді әлеуметтік қолдау шараларын іске асыру және олардың әл-ауқатын арттыру аясында Жұбанов университеті жеңілдетілген тұрғын үй бағдарламаларына қолжетімділікті қамтамасыз етеді.
Атап айтқанда, 2023–2025 жылдар аралығында университеттің 15 жас ғалымы Отбасы банкінің жеңілдетілген ипотекалық бағдарламасын пайдаланып, тұрғын үй жағдайларын жақсартуға және әлеуметтік қорғалу деңгейін арттыруға мүмкіндік алды.