23/07/2024
«Механика» зертханасы
Механика зертханасы серпімділік модулі және Юнг модулі, бұралу тербелісі және бұралу модулі, Хладни фигураларын салу, математикалық және физикалық маятниктер, Максвелл маятнигі, Атвуд машинасы, негізгі өлшеу әдістері және т.б. сияқты заманауи өлшеу құралдарымен жабдықталған. Бұл студенттерге кинематика және динамика, қатты дене механикасы бойынша эксперименттер жүргізуге, шеңбер бойымен қозғалыс, энергия мен импульстің сақталу заңдары секілді әртүрлі физикалық құбылыстарды зерттеуге мүмкіндік береді. Деректерді өңдеу және механикалық жүйелерді модельдеу үшін цифрлық технологияларды пайдалану студенттерге теориялық ұғымдар мен олардың практикалық іске асырылуын тереңірек түсінуге көмектеседі.
«Молекулалық физика» зертханасы
Молекулалық физика газдар, сұйықтықтар мен қатты денелердегі бөлшектердің әрекетін зерттейтін болғандықтан бұл бағыттағы зертхана температураны, қысымды, көлемді өлшеуге, сондай-ақ газдар мен қатты денелердің жылу сыйымдылығы, жылулық ұлғаюы және беттік керілу сияқты құбылыстарды зерттеуге арналған қондырғыларды қамтиды. Заманауи жабдықтар мен сандық бақылау жүйелері сұйықтықтың тұтқырлығы мен газдың сипаттамаларын өлшеу бойынша нақты эксперименттер жүргізуге мүмкіндік береді. Студенттер практикалық дағдыларды игеріп қана қоймай, нәтижелерді талдау және ғылыми жобаларды әзірлеу үшін заманауи бағдарламалық жасақтаманы пайдалана алады.
«Электр және магнетизм» зертханасы
Электр және магнетизм зертханасы электр тізбектерімен, генераторлармен, осциллографтармен, вольтметрлермен, амперметрлермен және магнитометрлермен жұмыс істеуге арналған өлшеу құралдарымен жабдықталған. Студенттер Ом заңдары, магнит өрістерін зерттеу, айнымалы және тұрақты токтың электр тізбектерін құру мен талдау, электромагниттік толқындарды зерттеу бойынша эксперименттер жүргізе алады. Электр процестерін модельдеу үшін цифрлық осциллографтар мен жүйелерді қолдану маңызды, бұл теорияны жақсы түсінуге және оны практикалық қолдануға ықпал етеді.
«Оптика» зертханасы
Оптика зертханасы лазерлермен, спектрометрлермен, интерферометрлермен, дифракциялық торлармен және жарықтың таралуын, оның материалдармен өзара әрекеттесуін және сыну, шағылу, интерференция, дифракция және поляризация сияқты құбылыстарды зерттеуге арналған басқа да құрылғылармен жабдықталған. Сондай-ақ күрделі оптикалық құбылыстарды визуализациялауға және оптикалық жүйелерді модельдеуге мүмкіндік беретін компьютерлік симуляторларды енгізу маңызды. Бұл студенттерге Снеллиус заңы, толқындар теориясы және жарықтың кванттық қасиеттері сияқты негізгі ұғымдарды игеруге көмектеседі.
«Атом және ядролық физика» зертханасы
Атом және ядролық физика зертханасы электронның элементар және меншікті заряды, Бальмер сериясы, бөлшектер детекторлары, спектроскоптармен байланысты зертханалық құрал - жабдықтармен жабдықталған. Студенттер Франк-Герц тәжірибесі мен фотоэффект құбылысын зерттей алады. Радиациялық деректерді бақылау және талдау үшін жоғары технологиялық жүйелердің болуы маңызды, бұл студенттерге жоғары технологиялық құрал-жабдықтармен жұмыс істеу дағдыларын дамытуға және заманауи ядролық физика саласындағы білімдерін тереңдетуге мүмкіндік береді.
«Физиканы оқыту әдістемесі» зертханасы
Физика саласындағы болашақ мұғалімдерді даярлау үшін оқыту әдістемесіне бағытталған мамандандырылған зертханалардың болуы өте маңызды. Физиканы оқыту әдістемесі бойынша зертхана интерактивті панель, мультимедиялық құралдар, сыныпта тәжірибе жүргізуге арналған зертханалар және физикалық процестерді модельдеуге арналған бағдарламалар сияқты заманауи оқыту құралдарымен жабдықталған. Студенттер физиканы тиімді оқыту әдістерін үйрене алады, білім беру бағдарламаларын әзірлейді және сынай алады, сонымен қатар оқушыларға оқытудың инновациялық тәсілдерін қолдана отырып практикалық сабақтар өткізе алады.
«Физика (IP)» зертханасы
2023-2024 оқу жылының екінші жарты жылдығында "Орта білім беруді жаңғырту" жобасын іске асыру шеңберінде Ғылым және Жоғары білім Министрлігінің қолдауы бойынша физика кабинеті жабдықталды. Физика кабинетін заманауи білім беру құралдарымен жабдықтау нәтижесінде студенттер сапалы білім алуға қол жеткізе алады. Оқытушылар күрделі физикалық процестер мен құбылыстарды тиімдірек түсіндіре алады, ал студенттер физиканы теориялық тұрғыдан оқып қана қоймай, нақты деректермен жұмыс істеуге, эксперименттер жүргізуге, нәтижелерді талдауға және өз қорытындыларын жасауға мүмкіндік алады.
